Yara na sa blue alert status ang siudad sang Bacolod humalin kahapon kag ginapaabot nga ipaidalum ini sa red alert status sumugod sa Huwebes, Abril 2 tubtob Domingo, Abril 5, bangud sa Semana Santa.
Ginsiling ni Dr. Anna Maria Laarni Pornan, pamuno sang City Disaster Risk Reduction and Management Office sang siudad, nga may mga teams na sila nga iga-deploy para sa Semana Santa.
Sa idalom sang red alert status, siento porsyento sang pwersa sang DRRMO ang naka on-duty.
May mga responders kag mga pulis ang ipahamatang sa mga simbahan sa siudad, kag may ara man sang personnel nga magapabilin sa talatapan sang DRRMO agud masiguro nga madasig ang ila pagresponde kun may emergency cases.
Nagapanawagan man si Pornan sa mga tag-iya sang mga resorts sa siudad nga sigurohon nga may ara sila naka standby nga mga lifeguards kag first aid responders.
Suno kay Pornan, obligado ang mga resort owners nga magsunod sa amo nga mando kag ang indi magsunod, pagahatagan sang sanction ukon may nakaigo nga penalidad, ilabi na kun may matabo gid man nga disgrasya sa sulod sang ila nga resorts.
Ini bangud ginalauman sang DRRMO nga magadagsa ang mga tawo sa mga resorts sa Bacolod bangud mas lapit ini kag indi na magasto pa sa gatong.*
[sibwp_form id=1]