Shadow

Konsehal sang Bacolod yara sa ospital bangud positibo sa COVID-19, barangay secretary sa Brgy. Bata patay bangud sang COVID

Isa ka konsehal sang Bacolod kag iya asawa ang gindala sa ospital matapos magpositibo sa COVID-19.

Ginkumpirmar sang source sang DIGICAST NEGROS nga naglain ang pamatyag sang konsehal sang nagligad nga Miyerkules kag gindala sa ospital sang Biernes.

Pati ang iya asawa ang gindala man sa ospital bangud naglain man ang pamatyag.

Suno sa source, indi maayo sa karon ang kondisyon sang konsehal sa ospital pero nag estable na ang kondisyon sang iya asawa.

Nag ayo ang pamilya sang konsehal nga indi lang anay pag ipalayag sa media ang natabo sa iya.

Samtang, ginsirad-an naman sumugod subong nga adlaw ang barangay hall sang Barangay Bata matapos nga magpositibo sa COVID-19 ang ila barangay secretary.

Ginpahayag ni Punong Barangay Angelito Abaring nga magapabilin nga sirado ang ila barangay hall sa sulod sang isa ka semana bangud ipaidalum ini sa disinfection.

Sang Abril 19 pa ulihi nga nakareport sa barangay hall ang ila secretary kag ginpapauli ini matapos maglain ang pamatyag kag ginbudlayan sa paginhawa.

Nagtaliwan ini sang nagligad nga sabado kag nagpositibo sa COVID-19 ang iya nga swab test.

Suno kay Abaring, luyag lang nila nga makapaniguro nga hilway sa virus ang barangay hall amo kun ngaa kinahanglan ini nga I-disinfect.

Sa barangay gym karon temporaryo nga naga opisina ang personnel sang barangay.

Leave a Reply

Your email address will not be published. Required fields are marked *

Secured By miniOrangeSecured By miniOrange