Paghinyo ni Mayor Albee Benitez sang authority to sign may angut sa kasugtanan sang Bacolod LGU kag Metro Towing Services natalana talakayon sang konseho.
Natagaan na sang accreditation sang Sanguniang Panlungsod ang Metro Towing Services.
Gani naghinyo naman sang authority to sign si Mayor Albee Benitez para sa panibag-o nga memorandum of agreement upod sa towing service.
Humalin sang nagligad nga tuig, ang towing service ang natagaan authority upod sa Bacolod Traffic and Transportation Management Department sa pagpatuman sang towing kag clamping operation.
Ginpahayag ni Councilor Al Victor Espino nga pamuno sang Committee on Transportation and Traffic sang konseho nga indi exclusive sa Metro Towing Service ang towing kag clamping operation bangud tubtob karon bukas sila sa mga interesado nga towing service para mapabaskog ang citywide towing kag clamping operation.
Ginsiling ni Espino nga indi anay makabalik sa pag-operate ang towing service samtang ginahikot pa ang kasugtanan may kaangtanan sa natukod nga ordinansa.