Isa ka Joint Executive Order nga naga porma sang Joint African Swine Fever Task Force sang Negros Occidental kag Bacolod City ang gin pagwa nanday Governor Eugenio Jose Lacson kag Bacolod Mayor Alfredo Abelardo Benitez.
Ini sa tinutuyo nga malikawan ang pagsulod sang buhi nga baboy, karne sang baboy kag iban pa nga pork products gikan sa mga lugar nga apektado sang ASF.
Kaina sang aga nagsapol si OIC-Provincial Veterinarian, Dr Placeda Lemana sa ginpadala nga team sang Bacolod para mag augment sa gina patigayon nga inspection sa mga puerto matapos ginmando man sang probinsya ang pagdumili sang pork kag pork products gikan sa isla sang Panay kag Guimaras nga magsulod sa probinsya kasunod sang suspected ASF case sa Iloilo province.
Suno kay Lemana, ini sila ang iga deploy sa Bredco kag Banago port lakip na sa Sum-ag bangud may mga magagmay man nga baroto nga nagadala sang isa kag iban nga processed food diri.
Maid-id ang monitoring sa mga naga sulod sa probinsya suno kay Lemana bangud indi ma risgo sang Negros Occidental ang 6 billion peso swine industry sini.
Sang weekend tigayon nga na confiscate sang ASF Task Force sa puerto ang mga pork products kasubong sang molo kag tocino, gikan Iloilo kag ini ang naga balor sang 20,000 pesos. Ini ang nabalik na sa mga shipper.