Gin-ako sang Romeo Nanta Command-New People’s Army (RNC-NPA) ang pagsunog sang isa ka backhoe kag duha ka dump truck sa Sitio Medel, Barangay Carabalan, Himamaylan City, Biyernes sang gab-i.
Domingo sang hapon, nagpagwa sang statement ang NPA nga ila ginsunog ang mga heavy equipment nga gina-gamit sa quarry operation nga ginapag-iyahan ni Punong Barangay Mildred Titular sang Carabalan.
Suno sa NPA, nagatuga sang halit sa Paniplan River ang quarry operation. Bangud sang tinuig na nga pagkutkot sa lugar, suno sa ila, nagadalum ang suba rason KUN nga nagakadulaan sang tubig ang mga talamnan kag uma sa palibot gani apektado na ang palangabuhian sang mga mangunguma.
Gindeklarar sang NPA nga yara sa P11 Milyones ang balor sang mga nasunog nga heavy equipment, apang P9 Milyones lamang ang estimate sang Himamaylan Bureau of Fire Protection. Ginsiling ni Fire Officer 2 Ronel Labansauan, chief investigator sang Himamaylan BFP, nakakuha na sila sang abo gikan sa mga nasunog nga equipment kag ila tinguhaan nga ipadala ini sa Fire Laboratory Service sa BFP National Headquarters agud mahibaluan kung may mga traces sang accelerants ukon mga materyales nga ginagamit para mapadasig ang paglapta sang kalayo.