Electrical equipment sa Halandumon Tower ginkawat.
Bacolod PNP nagpasalig nga pabaskugon ang tikang agud malubad ang kaso sang asud-asud nga kinawatay sa siudad.
Humalin pa sang nagligad nga tuig nga wala nagasiliga ang programmable light emitting diode sa palibot sang P4.8M nga Halandumon Tower sa kilid sang Bacolod Public Plaza.
Suno kay Public Order and Safety Office Head Primitivo Tabujara, bulan sang Oktubre sang nadiskubrehan nga wala na ang mga electrical equipment kag mga linya sang kuryente nga natago sa sulod sang mga columns sang tower rason nga wala na mapasiga asta subong ang tower.
Gin-welding na ang box nga gina sudlan sang mga equipment agud indi mabuksan sang mga kawatan.
Magluwas nga ginhugtan sang POSO ang pagbantay sa plaza, pabutangan man sang baral ang tower agud indi pamentahaan. Natungod naman sang mga asud-asud nga kaso sang kinawatay sa siudad, nagpasalig na si Bacolod City Police Office Director Col. Noel Aliño kay Mayor Albee Benitez nga mas pabaskugon sang kapulisan ang monitoring kag police visibility operations sa mga kabarangayan. Ginapa-usisa naman ni Aliño ang mga resulta sang ginahimo nga imbestigasyon sang pila ka mga Police Stations angut sa mga nagluntad nga kaso sang pagpangawat kun diin kabalanan sa mga ginpang sulod sang kawatan ang mga commercial establishment.