Grupo sang mga sugarfarm workers ang nagapamatuk sa pag-import sang P450,000 metric tons sang supply sang kalamay. Nagapati ang labor sector nga may yara sang pag-abuso sa sugar market.
Makaduha na ka beses nga napunggan ang plano nga pag-import sang supply sang kalamay sa pungsod sa tuyo nga mapahagan-hagan ang pagsaka sang presyo sa mga merkado.
Gani nakibot ang katapo sang Save the Sugar Industry Movement sa rekomendasyon sang Department of Agriculture kag Sugar Regulatory Administration nga mag-import sang 450,000 metric tons nga supply sang kalamay.
Para sa grupo may yara sang sugar market abuse amo kun ngaa ginapilit ang pag-import sang kalamay humalin pa sang nagligad.
Ang ginaduso nga tikang sang grupo para mapahagan-hagan ang pagsaka sa presyo sang kalamay amo nga mapabaskog sang mga natungdan nga ahensya sang gobyerno ang pagbantay
batuk sa sugar smuggling kag hoarding.
Upod sa malapit 700,000 ka mga agricultural workers nga nakasandig ang palangabuhian sa sugar industry, nagpa gwa sang manifesto ang Save Sugar Industry Movement sa tuyo nga mapunggan ang pag-import sang kalamay nga ila ginakahangaw-an maka-guba sa industriya sang kalamay.
Ginalauman nila ang suporta sang grupo sang mga sugar planters kag millers bahin diri.
Ang grupo sang sugar planters upod ang pila ka mga local kag national officials wala nagapamatuk sa plano nga pag-import sang kalamay basta may yara sang datus sa production sang kalamay agud mapat-od ang kadamuon sang iga-import nga supply kag yara sa timing ang pag-import sini.