20 anyos nga grade 11 student ang mahimo nasal-an lang sang gunman nga isa sa mga naghimulos sa iya anak kabangdanan nga siya ang gintiro kag napatay sa sulod sang iya balay.
Sa CCTV video makita ang biktima nga si Nicus Balagosa nga nagadalagan pasulod sa ila balay sang ginsulong sang mga ka mga lalaki nga armado sang pusil sa Granada Heights Subd., Barangay Granada, sa Bacolod sang Domingo sang gab-i.
Nagtuyo manago sa iya nga kwarto ang grade 11 nga estudyante pero ginsundan siya sang gunman kag didto gintiro sang makapila ka beses.
Ang biktima ang nag-angkon sang igo sang bala sa dughan kag tiil resulta sang iya kamatayon.
Ginsiling ni P/Capt. Portia Nillosan, commander sang Police station 5, nga sandig sa ila imbestigasyon ang biktima ang mahimo nasal-an lang sang gunman nga isa sa mga gin-alegar naghimulos sa iya menor de edad nga anak nga babaye.
Nag-gwa nga duha sa suspek sa paghimulos nga ginakabig abyan sang biktima ang masami naga-tambay sa bilyaran nga yara lang sa gwa sang ila balay.
Antes pa man natabo ang insidente, ginkastigo na sang gunman ang 17 anyos kag 19 anyos nga amo ang ginatudlo naghimulos sa iya anak.
Tungod sini hustisya ang padayon nga ginapanawagan karon sang pamilya sang biktima ilabi na nga naga-pabilin at large ang gunman kag ang duha niya ka mga abyan nga suspek sa kaso sang pagpanghimulos.