May duha na ka mga propiedad sa banwa sang La Castellana nga gina lantaw nga mahimo mangin permanent relocation site para sa mga apektado sang bulkan Kanlaon.
Samtang, yadtong mga internally displaced persons nga may mga maistaran nga himata ang gintugutan na magbiya sa evacuation center.
Suno kay Governor Eugenio Jose Lacson, may budget naman gid nga napain ang probinsya bilang bulig sa La Castellana LGU para sa permanent relocation site sang mga na apektuhan sang bulkan Kanlaon.
Ugaling kay ang una nga proposed site wala naka pasar gin-re-align ang pondo.
Pero subong suno kay Lacson may duha ka propiedad nga gina lantaw kag sa inisyal nga assessment ini ang pasado kag padayon ang negosasyon.
Suno kay Lacson maga pabilin ang assistance sang probinsya.
Samtang, masunod nga ginalantaw nga mahatagan sang konsiderasyon sa pag papauli ang yadtong mga naga puyo sa kilid sang dalan ukon malapit sa dalan.
Mahimo suno kay Lacson sila ang madason nga grupo nga tugutan maka pauli.
May anum ka bulan na nga yara sa mga evacuation center ang mga apektado.
Wala labot sini maga bukas na ang klase kag dala sa nakasugtan nga memorandum kinahanglan naman nga magamit sang mga eskwelahan ang mga classrooms para sa mga estudyante.
Ang sa bahin sang La Carlota City, ang mga indi sakop sang 6km danger zone ang papaulion na sa June 13 kag ang mga nabilin ang igasaylo sa central evacuation center sang siudad.