Paghatag approval sang konseho sa Memorandum of Agreement sa tunga sang Bacolod LGU kag towing services ginalauman sa natalana nga pagbalik sang towing kag clamping operation sa siudad.
Nagligad pa nga binulan sang natagaan sang accreditation ang Metro Towing Services nga amo ang kaupod sang Bacolod Traffic and Transportation Management Department sa pagpatuman sang towing kag clamping operation sa siudad.
Ugaling tubtob karon wala sa gihapon makabalik sa operation ang towing company.
Ginsiling ni Councilor Al Victor Espino pamuno sang Committee on Traffic and Transportation nga mahimo sa madasun nga session matigayon na nga maaprobahan sang konseho ang Memorandum of Agreement sa tunga sang Bacolod LGU kag towing services.
Ini sa paglaum nga mabalik na ang towing kag clamping operation sa siudad.
Ginaduso ni Espino nga matigayon ang lease agreement bahin sa pagpatuman sang clamping operation ilabi na nga wala man sang clamping equipment ang siudad sa pagpatuman sang towing kag clamping ordinance.
Nakasaad sa kasugtanan nga wala sang ginabaton nga share ang towing services bahin sa clamping operation.