Nagakatulog sa sulod sang balay ang 17-anyos nga soltero sang nakibot ini nga sa iya pagbugtaw, nagakasunog na ang puluy-an nga ila gina-arkilahan sa Barangay 2, banwa sang Hinigaran, Negros Occidental, Miyerkules sang hapon.
Nagtinguha ang soltero nga mag-gwa apang napaslawan nga mabuksan ang pwertahan tungod sang madamol nga aso kag kalayo.
Gani, nag-ideya na lamang ini nga gub-on ang plywood nga dingding sang ila kwarto agud may agyan ini pag-gwa.
Ginsiling ni Fire Officer 1 Alexis Escober, fire investigator sang Hinigaran Bureau of Fire Protection, pilason man ang 39-anyos nga sibilyan nga nagbulig palong sa kalayo matapos nga natandog sini ang kuryente nga naga-angot gikan sa poste padulong sa nagakasunog nga balay.
Nakaangkon ang sibilyan sang pilas sa ulo kag paso sa likod.
Gindala ang mga pilason sa Hinigaran Medical Clinic.
Yara na sa istable nga kondisyon ang sibilyan samtang ginsaylo naman sa ospital sa Kabankalan City ang 17-anyos nga soltero.
Base sa imbestigasyon sang Hinigaran BFP, nagsugod ang kalayo sa sala sang balay nga himo sa concrete kag light materials.
Ililikit ang mga pamalay sa lugar sang sunog, suno kay Escober, apang dako ang ila pagpasalamat nga wala na naglapta pa ang kalayo.
Nangin dako man ang bulig sang mga tawo nga nag-bucket brigade agud mapalong ang sunog.