
Nagsaka sa 214 million pesos ang kahalitan sang drought sa pananom sa probinsya. May pag-ulan naman sa pila ka bahin sang probinsya pero ini ang kulang pa.
Suno kay OIC-Provincial Agriculturist Dina Genzola, sa mga nagliligad nga semana may pag-ulan nga nagtupa sa pila ka bahin sang probinsya gikan sa light tubtob sa heavy rainfall.
Kaina may ginreport man nga pag-ulan sa Kabankalan City.
Ang ulan nga nagtupa sang nagliligad ang indi nagakaigo para masabat ang kakulang sang tubig sa pananom suno kay Genzola. Pero, makabulig man sa pag pabugnaw sa temperatura.
208 million pesos ang ginreport kahalitan sa humayan kag 5.8 million pesos naman sa maisan.
Suno kay Genzola, ila gina lantaw nga indi naman gid mag lala pa ang sitwasyon pero padayon pa ang pag abot sang report bahin sa kahalitan sang yadtong wala pa maka submit nga mga lgu kag padayon man ang validation sang OPA.
Minimal ang kahalitan sa irrigated areas kun ipaanggid sa rain fed areas ukon ang naga salig lamang sa ulan.
Gina hulat man nila ang datus para mapat-od ang mangin rice production. Indi ma negar nga apektado ang production pero naga laum sila nga maka deliver sang 5 to 6 metric tons per hectare ang mga irrigated areas.
“To balance lang guro sang soil, indi pa gid siya too much ka penetrate sa soil. Pero naga ano (bulig) siya sa temperature. Bal-an mo kun tuman ka init, kis-a gani naga indakal pa ang tubig sa humay bisan irrigated. Pero hopefully ang rains epecially sa rainfed maka condition siya diutay, pero te kay may litik man”, suno kay Genzola.