Nagpasalig ang Department of Education-Negros Island Region nga ila pagatutukan ang learning continuity sang mga estudyante sa pihak sang sunod-sunod nga pagkansela sang face-to-face classes bangud sa tuman ka init nga panahon.
Ginsiling ni DepEd-NIR Diretor Ramir Uytico nga may mga tikang na sila nga gina-obra agud masiguro nga mahatagan sang mga tulun-an kag ulubrahon ang mga estudyante bisan pa nga yara lang sila sa ila mga balay.
Ini ang suno sa iya kinahanglan sang mga estudyante agud masiguro nga indi ma delay ang ila pagtuon bangud sa mga cancelation of classes tuga sang high heat index.
Dugang ni Uytico, apisar sa mga limitasyon sang pagtuon sang mga bata sa ila mga panimalay, may mga teaching kag learning materials nga ipadala ang mga manunudlo para may yara sila sa gihapon tun-an kag agud indi man maayawan ang mga manunudlo nga maglagas sang ila klase.
Sini nga adlaw, liwat na naman nga nagkansela sang face-to-face classes ang pila ka mga eskwelahan kag LGU sa Negros Occidental kag iban nga mga eskwelahan sa Bacolod City bangud sa 40 degrees celsius nga heat index.
Wala pa sang may na rekord nga mga insidente may kaangtanan sa heat index sa sulod sang mga eskwelahan suno sa DepEd.
Sa idalum sang memorandum number 64 sang DepEd, yara na sa desisyon sang tagsa ka school heads ang pagkansela sang face-to-face classes sa ila tagsa ka eskwelahan, apang kun yara na sa 33-41 degrees celsius ang heat index, ginrekomenda sang ahensya ang pag-cancel sang face-to-face classes kag kun magdangat naman ini sa 42 degress celsius pasaka, suspendido man tanan nga aktibidad sang mga estudyante.
[sibwp_form id=1]