Dakpanay sang colorum nga jeepney magapadayon bisan pa ginpalawig ang deadline sa jeepney consolidation sa Abril 30.
Gin-aprobahan na ni Presidente Ferdinand Marcos, Jr., ang extension sang deadline for consolidation sang mga traditional jeepney operators kag drivers tubtob Abril 30 para sa mga nagpabutyag sang interes sa Jeepney Modernization Program.
Sang nagligad nga Disyembre 31 ang ginhatag sadto nga deadline para sa katapo sang traditional jeepney organization nga mag consolidate sang ila prangkisa agud makatukod sang kooperatiba nga requirement para sa modernization program sang Department of Transportation.
Ginkalipay sang mga transport organization ang ginpalawig nga deadline.
Pero suno kay City Legal officer Atty. Romeo Carlos Ting, Jr., bisan ginpalawig ang pagbyahe sang traditional jeepney magapadayon gihapon ang dakpanay batuk sa mga colorum nga jeep ilabi na ang wala natagaan sang provisional authority ukon PA para magbyahe sa siudad.
Suno kay City Administrator Lucille Gelvolea magapatuman sila sang tagging ukon ang pagbutang sang stickers nga may QR code sa mga traditional jeepney nga may yara sang PA kag nalakip sa mga operators kag drivers nga nagbutyag sang intensyon nga mag consolidate sang ila prangkisa.
Magahinyo man sang pagsulundan ang Bacolod LGU halin sa Land Transportation Office angut sa mga nagabyahe nga traditional jeepney nga indi luyag mag-consolidate kag wala sang kooperatiba sa pagtakop sang Enero 31.