Nagdangat sa masobra 42 million pesos ka mga pork kag pork meat products ang nadakup sang ASF Task Force sa mga puerto sa probinsya lakip na Bacolod kag sa mga checkpoints sang 2023.
Nagapabilin ang hugot nga pagbantay sang ASF TF sa mga entry points sa probinsya sa tinutuyo nga ma pangapinan ang probinsya sa ASF labi na nga controlled na ang kaso sa karon.
Sa report sang Provincial Veterinary Office, humalin Enero tubtob Disyembre sang nagligad nga tuig may 20,376 ka kilo kag masobra sa 53,000 ka mga boxes ukon tubs sang nagkalain-lain nga mga pork products ang nadakup nila sa mga seaport kag checkpoints sa mga gin patigayon nga monitoring sang African Swine Fever Task Force.
42,066,046 pesos ang balor sang mga nagkaladakpan nga produkto.
Suno kay Dr Placeda Lemana ang Provincial Veterinarian, kalabanan diri gikan sa Bredco Port sa Bacolod bangud nga yara man diri naga dungka ang mga roro vessels.
Kun bulk naman nga mga produkto ang madakpan suno kay Lemana, masami ini ang gina ship back base man sa kasugtanan sa nagpadala sini.
“Bredco kay tungod nga ara da ang roro so ang kalabanan halos dira is handcarry. Ang mga kinilo-kilo bala da. Pero kun bulk siya, volume, kalabanan ang mga owner naga decide nga i-ship back. Kay tungod nga roro, every hour may naga abot. May naga dala gid”, suno kay Lemana.