Sa idalom sang alert level 4 status sang Bacolod, ginadumilian gihapon ang mga menor edad kag mga naga-edad 65 anyos pasaka nga mag-gwa sa ila puluy-an.
Ini magluwas lang kun sila ang nagapabakuna kag kun may emerhensya kag kinahanglanon.
Pero humalin pa sang weekend makit-an bisan pati ang mga magagmay nga mga kabataan sa mga mall sa Bacolod.
Suno kay Dr. Chris Sorongon, deputy for medical data and analysis sang Emergency Operations Center, may yara sang miscommunication sa gin-anunsyo nga alert status sang siyudad.
Ang Bacolod yara sa gihapon sa alert level four kag wala pa ini ma downgrade.
Pero ginsugilanon na sang katapo sang EOC ang mga mall managers pati na ang pamunuan sang ila security personnel agud indi na matugutan ang pag-lagaw sang mga kabataan sa mga mall kag bisan sa iban pa nga commercial establishment.
Ginpaandaman naman sang pamunuan sang EOC ang mga tagdumalahan sang mall kag commercial establishment nga sarang man ma revoke ang nahatag nga safety seal kun magapadayon ang ila pagbaton sang menor de edad sa idalom sang alert level 4 status.
Sumugod nobyembre uno tubtob katorse ginpaidalom sang national IATF sa alert level 4 ang Bacolod.
Samtang, ginpaandaman man ang mga market supervisors angut sa nagalapta nga video sang mga kabataan nga naga-practice sang ila political chant sa gwa sang Libertad Public Market.
Kadam-an sa mga kabataan ang wala sang suksok nga facemask kag faceshield. Amo nga ginmanduan na sang pamunuan sang EOC ang katapo sang Task Force Disiplina nga hugton ang pagbantay sa palibot sang merkado agud mapaiway ang kasubong nga hitabo.