City Legal Office natalana nga magapatuman sang review sa mga ordinansa nga nagakinahanglan nga maligwat agud man mapabaskog ang mga penalidad.
Antes nagtakop ang tuig, natigayon nga nakabalik operate ang napasirad-an nga restobar sa 17th Lacson Street.
Ini matapos man makabayad sang P1,500 nga multa sang matalupangdan naga-operate nga wala sang business permit kag may mga menor de edad nga napat-ud naga-inom.
Gani si Mayor Albee Benitez nagmandu sa city legal office nga tun-an ang mga ordinansa nga kinahanglan ma-review agud man ma-ammend kag mapasakaan ang mga penalidad kun nagakinahanglan.
Suno kay City Legal Officer Atty. Romeo Carlos Ting, Jr., usisaon man nila ang mga commercial establishment kun naga-misdeclare sa ila mga requirements sa pagkuha sang permit sa siudad.
Upod sa katapo sang Business Permits and Licensing Office, nagpasalig man siya sang mas masupog nga inspection sa mga komboyahan.