Ceremonial vaccination para sa COVID-19 nanday Bacolod Mayor Evelio Leonardia kag sang mga punong barangay sang siudad ang wala gindayon subong nga adlaw.
Ginpahayag ni City Health Officer Dr. Edwin Miraflor nga sala ang iya paghangup sa paglakip sang National Inter-Agency Task Force against Emerging Infectious Diseases sa mga local chief executives bilang isa sa mga prayoridad sa mga pagabakunahan.
Apesar nga nagsugot na ang NIATF nga ilakip ang mga provincial governors kag mayors sa priority list kinahanglan nga unahon gid anay bakuna ang mga health care workers sa tunga sang limitado karon nga supply sang vaccine sa pungsod.
Suno kay Miraflor, gintalana nila kuntani ang ceremonial vaccination para mangin ehemplo sa publiko ang alkalde kag mga punong barangay nga wala sang dapat ikahangawa sa pagpabakuna kontra COVID-19.
Bangud sang NIATF priority list, magahulat na lamang ang mga opisyales sang siudad kun malab-utan na sila sang ginapaabot pa nga dugang nga mga bakuna.