Shadow

Barbecuehan sa tabok LCC padayon nga naga survive sa pihak sang pandemic

Kun mag labay ka sa Galo Street sa Bacolod sa tabok lang sang La Consolacion College Bacolod, agaw atensyon ang mahamot nga aso…

Naga idas ang pork barbecue sa parillahan…

Naga ka taktak ang mantika sang tambok sang baboy samtang yara sa baga..

Gina banyasan para sa dugang nga pasabor…

Kag kun luto na, gilayon nga gina bak-it, putos sa brown nga papel kag bitbiton na sang customer! Kun ikaw naga labay lang, indi ka ayhan maganyat mag bakal?

Ini ang eksena sa gwa sang isa sa mga popular nga barbecuehan nga Tikboys!

Suno sa mismo tag-iya nga si Tikboy Tunogbanua, 1983 pa sila nag sugod sa pagbaligya sang pork barbecue. Sang una siya pa lang tubtob may mga nagbinaligya naman. Apat sila sang una naga kompetensyahan karon duha na lang ang nabilin.

Istorya niya, nag experiment lang siya sa marinade sang baboy kag sang ulihi nangin popular na ang iya pork barbecue.

1988 kuno nag sugod sikat ang iya pork barbecue kag nag sige sige na. Kada panyaga naga pila ang tawo sa iya kalan-an. Kada may okasyon ukon Christmas party, libo libo ang orders. Sang una, makapa ubos siya sang siyentos singkwenta ka kilo sa isa ka adlaw. Pero nag igo ang pandemic. 80 porshento sa iya nga sales ang nadula.

Halin sa 150 kilos sa kada adlaw, subong 20 kilos na lang.

Wala man abe sang face to face classes. Kadam-an sa mga customer niya mga estudyante.

Pero sa sitwasyon sa karon, naga pasalamat siya nga naka survive sila sa pandemic. Naga laum siya nga magbalik na ang face to face classes para maka bangon na sila liwat gikan sa halit sang pandemic.

Secured By miniOrangeSecured By miniOrange