Isa ka nagakaagnas nga bangkay sang lalaki ang nasapwan sa sulod sang Hyundai Getz nga salakyan sa Palm State, Futura Homes sa Barangay Efigenio Lizares, Talisay City kagapon.
Ginabulubanta 5 feet and 2 inches ang kataason sang biktima, naga-edad 35 tubtob 40 anyos, kag nakasuksok lamang sang pula nga boxers shorts.
Nasapwan ang bangkay sa nakahilay nga driver’s seat kag posible nga tatlo tubtob lima na ka adlaw ang bangkay sa sulod sang salakyan.
Wala naman sang missing nga persona sa siudad sang Talisay, suno sa pulis.
Indi kilala sang tag-iya sang salakyan ang patay nga tawo.
Ginsiling ni Police Major Rhazl Jim Jocson, deputy chief sang Talisay PNP, wala masyado nga ginagamit sang tag-iya ang salakyan bangud gingamit niya ang battery sini sadtong nagbagyo kag may isa pa gid siya ka salakyan nga amo ang masami niya nga ginamaneho.
Dugang pa ni Jocson, Martes nga adlaw, nag-abot ang gin-order nga charger sang battery kag sang nagpalapit ang tag-iya sang salakyan, may naga usbong na nga baho.
Sa karon, yara ang bangkay sa Manapla Funeral Homes kag ginpaidalum sa autopsy agud mahibaluan ang gintunaan sang iya kamatayon.*