Viral sa social media ang video sang pag karusdak sang bahin sang kisame sang Annex Building sang Cadiz District Hospital.
Sa post ni Gladdix Gomia Vlog makit-an ang pag tubod sang tubig gikan sa kisame kag pila ka segondo lamang na rusdak ang kisame.
Suno kay Gladdix timing lamang nga yara siya sa lugar kag nakuhaan sang video.
Suno kay Provincial Health Officer Dr Girlie Pinongan wala sang may nahalitan sa mga pasyente ukon sa staff sa amo nga ospital.
Ginsiling ni Provincial Engineer Ernie Mapa nga nakaayo na ang amo nga bahin sang kisame nga yara sa bahin sang nurse’s station sa second floor sang Annex Building sang Cadiz District Hospital.
Paathag niya, gab-i sang Oktubre 8 natabo ang insidente kasunod sang mabunok nga ulan.
Ang downspout sang gutter sa atop ang nasupunan sang mga dahon rason nga nag overflow ang tubig sa kisame.
Ini ang rason sang pag karusdak sang bahin sang kisame.
“Ang mga dahon sa kahoy amo to nag accumulate, nagtabon sa downspout sang aton nga gutter. So nag overflow siya going to the ceiling amo na ang tendency sang tubig. Ato siya nga area na saturate sang tubig amo to nga nag bigay ang ceiling. Indi man gani isa gid ka plywood. 4×4 siguro, which is nga na replace naman nila”, suno kay Mapa.