Matapos ang masobra sa isa ka oras nga mabunok nga ulan sa Bacolod City sang kagab-i dala ng Southwesterly windflow kag low pressure area, ginbaha ang 12 ka mga barangay sa siudad.
Ini base sa record sang Bacolod City Disaster Risk Reduction Management Office.
Ang apektado nga mga barangay amo ang Barangay 1, 3, 9, 12, 17, 20, Banago, Mandalagan, Montevista, Singcang-Airport, kag Taculing.
Ang mga residente sang Lopez Jaena Street nakibot bangud nga subong lang sila ginbaha.
May mga lugar nga halos apat ka tapak ukon 4 feet ang kadalumon sang tubig parehos na lamang sa Barangay Mandalagan kag Villamonte.
Sa Purok Carvic sa Mandalagan, daw masulod na sa bentana sang isa ka pamilya ang tubig baha.
Mabaskog ang current sang tubig baha. May mga residente nga gin-evacuate.
Sa Villamonte naman, gin-rescue sang Bureau of Fire Protection ang mga pamilya nga indi man kagwa sa ila nga balay bangud sang nagadalom nga tubig kag mabaskog man nga daludo sang baha.
Matapos ang pila ka oras nagtahaw man ang tubig baha kag subong wala na sang may nagapabilin pa sa evacuation centers sa Bacolod.