Ginbawian sang kabuhi ang 50-anyos nga rider matapos ginbungguan sang nagasunod nga motorsiklo sa Circumferential Road, sa atubang sang Villa Socorro 2 Subdivision sa Barangay Taculing, Bacolod City, kagab-i.
Sa imbestigasyon sang Traffic Enforcement Unit, pareho nga nagapadulong sa sur sang Circumferential Road ang biktima sakay sang iya Yamaha Mio nga motorsiklo kag ang Honda Airblade nga motorsiklo, nga ginamaneho sang wala pa makilal-an nga persona.
Nagasundanay gikan sa Bacolod City Government Center ang duha ka mga riders sakay sang ila tagsa ka mga motorsiklo kag padulong Bangga Cory.
Gin-alegar na miscalculate sang driver ka Honda Airblade ang distansya kag nalab-ot ang Yamaha Mio nga motorsiklo sang biktima.
Bangud sang impact, natumba sa dalan ang duha ka mga riders.
Ang driver sang Honda Airblade ang nagbangon matapos matumba kag nagpalagyo sakay sang iya motorsiklo padulong sa sur nga direksyon.
Gindala ang biktima sang nag-responde nga personnel Amity Volunteer Fire Brigade sa Corazon Locsin Montelibano Memorial Regional Hospital apang siya ang napatay.
Residente sang Barangay Alijis sa Bacolod ang biktima, nga naga-obra bilang mekaniko.
Padayon naman nga ginapangita ang driver sang Honda Airblade nga may plate number 2960NM.