Oktubre 30 sang gin turn over sang Department of Public Works and Highways ang ini nga quarantine facility sa Barangay Alijis sa lokal nga panguluhan sang Bacolod.
Wala pa sang may gina quarantine diri.
Wala pa man abe sang kaugalingon nga power supply ang pasilidad.
Suno sa kay Councilor Renecito Novero, chairman sang City Quarantine Center Action Team, gina proseso na ang mga kinahanglan nga dokumento para tigayon nga matakdan sang kaugalingon nga supply sang kuryente ang pasilidad.
Pero kun kinahanglan man gid nga gamiton ini, sarang man sila maka tap sa kuryente sang City Agriculture Office nga nahamtang malapit lang sa facility.
May 32 ka mga kwarto ang quarantine facility sa Alijis nga gin patukod sang DPWJ. 25 milyones pesos ang balor sang amo nga proyekto.
Paathag ni Novero wala gina gamit ang quarantine facility kay indi pa man kinahanglan.
Indi pa man masiling kun san-o ma human ang pag proseso sang mga dokumento para tigayon ini nga matakdan sang kaugalingon nga power supply.
Gintukod ini bilang dugang nga healthcare facility para sa mga asymptomatic kag mild COVID-19 patients.
Ginsugran ang pag construct sini sadtong Agosto katorse.