Gindakop sang ka gab-i ang tatlo ka mga persona matapos makuhaan sang masobra 20 ka bulto sang gina patihan shabu sa buybust operation sa pagpanguna sang PNP Drug Enforcement Group sa Scorpio Street sa Barangay Singcang-Airport.
Subject sang buybust amo si Jun Mark Ibe. Naaresto man ang iya live-in partner nga si Regine Arroz kag kabulig nga si Shiela Mhary Balarao.
Nagabug-at sang kapin 2 ka kilo ang nakuha nga suspected shabu kag ginabulubanta nagabalor sang P13,600,000.
Suno kay Police Captain Jun Ray Batadlan, hepe sang Police Station 8, si Ibe ang nagabaton sang items nga ginapadala gikan Manila paagi sa courier service kag iya man ini dasun ginapadala. Ang iya bulig nga si Balarao ang iya ginapabaton kag gina pa padala sang items suno kay Batadlan.
Ang PNP Drug Enforcement Group sa Manila amo ang naka baton sang impormasyon angut sa transaksyon ni Ibe kag sila ang nakig angut sa PNP-DEG diri sa Bacolod.
Detained karon sa Police Station 8 ang tatlo kag kaso nga pagsupak sa RA 9165 ang ipasak batuk sa ila.