Pagbukas sang bag-o nga talatapan sang Land Transportation Office, bagsakan para sa organic produce kag pag operate sang shared facilities sang probinsya ang pila lamang sa gina paabot sa bulan sang Enero.
Yara sa Manayao-sayao sa Barangay Mansilingan sa Bacolod City ang bag-o nga talatapan sang Land Transportation Office nga napahamtang sa duta mismo sang probinsya.
Suno kay Provincial Administrator Rayfrando Diaz ang probinsya man ang nag patindog sang building nga naga balor sang 33.35 million pesos ilakip ang pagpader, kag gina hulat na lamang ang kumpirmasyon sang isa ka undersecretary sang Department of Transporation para sa blessing sini sa Enero.
Ang daan naman nga talatapan sang LTO sa Cottage Road ang gina planuhan nga iga convert sa isa ka multi-use building ukon CyberCentre 2 suno kay Diaz, pero kinahanglan pa ang feasibility study.
Isa sa mga ginalantaw suno sa kay Diaz amo nga ang daan nga talatapan maga serbe nga halfway house sa mga out of town watcher sang mga pasyente sang Corazon Locsin Montelibano Memorial Regional Hospital, kasubong man pahamtangan sang talatapan sang Boy Scouts of the Philippines.
Sa Enero gina paabot man ang pag operate sang organic trading post nga maga serbe nga bagsakan sang mga organic produce.
Gina paabot man ang pag operate sang shared facility sang probinsya kaupod sa mga partners sini kun sa diin sarang maka patigayon sang food processing.
Suno kay Diaz, ang bulk water project naman ang ginakabig nga major project para sa 2023 nga gina paabot maka patigayon na sang bidding sa bulan sang Hunyo. Ginalantaw ini nga sabat sa kakulang sang tubig sa probinsya kag Bacolod City.