Wala sang may na-qualify sa 16 ka mga eskwelahan nga gin submit sang Negros Occidental Division para sa posible pilot nga pagpatuman sang face to face classes.
Ini suno Ian Arnold Arnaez ang PIO sang DepEd Negros Occidental Division.
Sang December 2020 gin pa submit ang kada division sang listahan. Matapos ang evaluation kag assessment sang central office wala may naka pasar sa 16 para sa pilot nga pagbalik sang face to face suno kay Arnaez.
May eskwelahan sa Talisay nga ginalantaw man kuntani para sa face to face, pero ini ang na disqualify man bangud sang pagsaka naman sang kaso sa lugar.
Madamo sang factors nga ginahatagan sang konsiderasyon para maka pasar sa evaluation kag assessment. Nalakip diri ang community quarantine status sang lugar kun diin nahamtang ang eskwelahan, ang pag tugot sang ginikanan para sa ila nga kabataan kag bisan pa ang desisyon sang LGU.
Suno kay Arnaez ang kada kada division may school safety assessment team. Kag ini ang padayon nga maga assess para sa school for face to face classes.
Samtang sa Bacolod naman ginpropose para sa face to face ang Alangilan National High School Senior High School. Pero suno kay City School Division Superintendent Gladys Amylaine Sales ini ang maga depende sa assessment sang central office.
Samtang, gina abi-abi naman ni Provincial Administrator Rayfrando Diaz ang lihok nga pagsugod sang pagbakuna sa mga menor de edad. Sa ini nga pamaagi sarang na magbalik sa normal ang ila sini nga pag eskwela kasubong sang face to face.
“Damo siya factors, indi lang school preparedness, hasta ang community status kun ano ang mga cases sa covid gina consider man na siya. Basta may ara lang mag exist nga positive daw gina dq (disqualify) nila dayon,” suno kay Arnaez.