Shadow

22 ka mga pulis gin-deploy na sa mga isolation facility sa Bacolod

Balik na sa 11 ka nabilin nga isolation facility sang Bacolod ang 22 ka mga pulis gikan sa Bacolod City Police Office.

Sila ang magabantay 24/7 agud man mapasiguro ang kalinong sa mga isolation facility kag mapaiway ang pagpalagyo sang mga gina-isolate nga Covid-19 positive sa pasilidad.

Nagligad lang nga Oktubre 30 sang makapalagyo ang isa ka 40 anyos nga lalaki nga Covid-19 positive sa isolation facility sa Barangay Tangub tubtob nga siya ang nasapwan nga patay sa kilid sang baybay sa Barangay Pahanocoy.

Isa man ka 37 anyos nga lalaki ang nalagyo sa isolation facility sa Barangay Bata sang nagligad nga adlaw. Pero nabalik na sa sulod sang pasilidad.

Suno kay police lieutenant Colonel Lester Leada, pamuno sang BCPO Operations Management Unit, gin-deploy sadto sa mga patyo ang pila ka mga pulis sang tigkalalag kag ang iban yara pa sa training amo nga nabilin sa mga barangay tanod ang pagbantay sa mga isolation facility.

Ginalauman karon sang pamunuan sang BCPO upod sa Emergency Operations Center ang kooperasyon sang publiko ilabi sang mga yara sa isolation agud nga indi na maglab-ot sa punto nga sila ang mapasakaan pa sang kaso angut sa pagsupak sang Republic Act 11332 ukon ang mandatory reporting of notifiable diseases and health events of public health concern act.

Leave a Reply

Your email address will not be published. Required fields are marked *

Secured By miniOrangeSecured By miniOrange