Duha ka suldado ang napatay samtang apat pa ang pilason sa kapin isa ka oras nga enkwentro nga nag luntad kahapno sa Sitio Tiyos, Barangay Quintin Remo sa tunga sang combined forces sang 62nd kag 79th Infantry Battalion batuk sa ginabulubanta 25 ka mga rebeldeng New People’s Army.
Suno kay Captain Kim Apitong, spokesperson sang 3rd ID, ang tropa ang nag patigayon sang combat operations batuk sa mga rebelde bangud sang impormasyon nga ila nabaton angut sa plano nga pag pang atake sang mga rebelde sa lugar ilabi na sa ginahimo nga farm to market road sa Guihulngan City.
Magluwas sa mga napatay kag napilasan sa bahin sang army, suno kay Apitong, may apat man ka miyembro sang npa nga posible napatay ukon severely wounded sa enkwentro.
Matapos ang isa ka oras tapos sang una nga enkwentro, naka enkwentro man sang blocking force sang army ang pila sa mga nag palagyo nga mga rebelde kag na recover ang mga backpacks, cellphone, bala kag iban pa nga pagkabutang.
Samtang, ginpahayag man ni Mayor Ella Garcia-Yulo nga may masobra 800 ka pumuluyo sang Barangay Quintin Remo ang karon gin evacuate bangud sang nagluntad nga enkwentro.
Temporaryo karon nga naga tiner sa mga evaciation site ang mga pumuluyo samtang naga padayon ang pursuit operation sang army.