Yara nasa paghinakop sang Women and Children’s Protection Desk kag sa social workers ang duha ka menor de edad nga babaye matapos nga gin-rescue sila sang kapulisan sang tinalikdan nga semana.
Sa inisyal nga impormasyon sang WCPD, ginapatihan nga ginakuhaan sang video ang duha ka biktima kag ini ang ginabaligya online.
Ginsiling ni Police Captain Ma. Liberty Indiape, pamuno sang WCPD, nga gin-refer sang mga nagkalain-lain nga ahensya sa ila ang kaso nga may gina-alegar biktima sang Online Sexual Abuse and Exploitation of Children sa siudad.
Matapos ma-verify sang kapulisan ang report, ila na nga gin-rescue ang duha ka babaye nga naga edad 13 tubtob 14 anyos.
Ginkumpirmar man ni Indiape nga may persona nga legal ang pang-edaron ang imbolbado sa amo nga aktibidad.
Ginalantaw sang kapulisan nga posible isa ka organisado nga grupo ang yara sa likod sini.
Nagapadayon pa ang pagpang-usisa sang WCPD sa kaso.
[sibwp_form id=1]