Nagdangat na sa lima ang napatay sa Bacolod City bangud sa masakit nga Dengue. Ini matapos nga gin-report sang Bacolod City Health Office nga may duha pagid ka bata nga lalaki ang napatay.
Nagdugang sang isa ka dengue death ang Barangay Mansilingan. Isa ka 9 anyos nga lalaki ang biktima nga ginbawian sang kabuhi September 2.
Suno sa record sang CHO nagabalik balik ang hilanat sang amo nga bata kag ginbawian ini sang kabuhi sang September 2. Suno sa CHO, wala nakaagi pa konsulta ang bata antes pa ini nadulaan sang kabuhi.
Samtang, isa naman ma 8 anyos nga lalaki sa Barangay 16 ang napatay sang September 8 bangud sa amo man nga masakit.
September 7 gin admit sa hospital ang biktima bangud sa hilanat kag pagsuka. Wala man ini nakaagi pakonsulta suno sa CHO.
Sa karun may 666 na ka dengue cases ang Bacolod City samtang lima naman ang napatay. Ini ang mas manubo pa sang 15.5 percent kun ikumpara sa 788 cases mag 5 deaths sang tinalikdan nga tuig.
Nagapabilin nga may pinakamadamo nga kaso ang Mansilingan, Handumanan, Estefania, Sincang-Airport kag Alijis.
[sibwp_form id=1]