Himata sang soltero nga ginbuno-patay sa Mandalagan, sa Bacolod ang nagapangayo sang hustisya.
Nagdangup sa social media agud mangayo sang hustisya ang pamilya kag mga abyan ni alyas Yuri nga ginbuno-patay sa atubang sang isa ka restobar sa dalan Lacson, Barangay Mandalagan sa siyudad sang Bacolod, Martes sang kaagahon. Ang 18 anyos nga biktima, ang residente sang Barangay Efigenio Lizares sa syudad sang Talisay kag bag-o gid lamang naka-enroll bilang 1st year college. Ginsiling ni Police Major Rondyl Tapang, hepe sang Bacolod Police Station 3, gindala pa sa ospital ang biktima apang ini ang gindeklarar nga dead on arrival. Sandig sa imbestigasyon sang kapulisan, resulta sang komusyon ang nasambit nga pagbuno, sa tunga sang biktima upod ang iya migo, kag sang grupo sang nagbuno kag tatlo sini ka mga kaupdanan nga nagbulig man sa pagsumbag kag pagkastigo. May person of interest na ang kapulisan apang indi pa nila mapagwa ang ngalan sini bangud padayon pa nga ginapangita. Ginsiling man ni Tapang nga may naka-identify sa suspek nga nagbuno sa biktima. Ang suspek, suno sa imbestigasyon, isa ka regular nga customer sang nasambit nga restobar. Igo sa li-og kag dughan ang inisyal nga nakita nga pilas sa biktima apang nagahulat pa ang kapulisan sang medical abstract agud mapat-od ang gintunaan sang iya kamatayon. Nagapangabay naman ang pamilya ni Yuri sa suspek nga magsungka na kag atubangon ang nahimo sini nga krimen.