Patay ang 13-anyos nga solterito matapos nga aksidente natiruhan ang iya kaugalingon gamit ang air gun, Domingo sang hapon sa Hacienda Dos Hermanos, Barangay Purisima, sa banwa sang Manapla.
Base sa record sang Manapla PNP, nagtambong ang ginikanan sang biktima sa isa ka meeting sa ila nga Barangay. Ginpahibalo na lang sila sang bata nila nga babaye nga aksidente nga natiruhan sang iya utod ang iya kaugalingon sa iya tuo nga kilay gamit ang air gun.
Sa inisyal nga imbestigasyon sang PNP, nakabati sang lupok ang utod sang biktima kag naabtan niya sa ila sala ang duguon nga lawas sang biktima.
Ginhingagaw dala sa ospital ang menor de edad apang pagkaligad sang isa ka oras, napatay ini.
Boluntaryo naman nga gin surrender sang ginikanan sang biktima ang air gun sa PNP kag nagapati sila nga wala sang foul play sa natabo.