Matapos ang malawig nga tion, nangin legal na ang 12 ka mga ambulant vendors nga nagabaligya sa La Salle Avenue sa Bacolod City, sang ginhatagan na sila sang siudad sang special permit.
Ginsiling ni City Administrator Atty Mark Steven Mayo, nga nalakip ang amo nga lugar sa vending ordinance sang siudad, kun sa diin ginatugutan ang pagbaligya.
Dugang pa niya, ini ang pinakauna nga tion nga gin-regulate sang siudad ang mga vendors sa area.
Sandig sa special permit, kinahanglan nga sundon sang mga vendors ang oras kun san-o lang sila makabaligya sa lugar.
Las kwatro sang hapon tubtob sa gab-i ang oras nga ginhatag sang siudad sa ila agud makabaligya.
Ginklaro man ni Mayo, nga mga food carts lamang ang gintugutan kag ginadumilian ang permanente nga istruktura.
Ginalantaw pa sang siudad ang posibilidad nga madugangan ang 12 ka mga vendors nga nahatagan permit, samtang gina-assess man nila ang kalaparon sang area nga nasaad sa ordinansa.
[sibwp_form id=1]