Amay nga masugat kuntani sa iya anak ang patay sang mabungguan sang pick up ang iya gindala nga tricycle. Iya misis maulbha ang kahimtangan sa ospital.
Wala na sang kabuhi sang maabtan sang kapulisan sa dalan Araneta sa Barangay Sum-ag Bacolod City ang 66 anyos nga si “Rogello” samtang duguon naman ang asawa niya nga si “Liberty”, las 2 sang kaagahon sang Biyernes, Oktubre 9.
Ini matapos nga nabungguan sang pick up ang tricycle nga ginasakyan sang mag-asawa nga magasugat lang kuntani sa ila bata gikan sa trabaho.
Isa ka katapo sang Philippine Coast Guard ang nagadala sang pick up nga si alyas “Ranty”, 33 anyos kag na assign sa Pulupandan. Kaupod niya ang duha pagid sini ka abyan sa sulod sang salakyan.
Sandig sa imbestigasyon sang kapulisan, padulong sa Bacolod City ang pick up kag gina-alegar nga wala niya matalupangdan ang tricycle nga iya ginasundan gani iya ini nabungguan.
Suno pa sa inisyal nga impormasyon gikan sa PNP mismo, yara sa idalum sang impluwensya sang makahulubog nga ilimnon ang drayber sang pick up.
Magluwas sini, nadalasa man sang pick up ang isa ka jeep nga padulong man sa Bacolod City, rason nga nagdiretso ini sa isa ka private nga construction site sa higad sang dalan, apang wala man nasamaran ang drayber sang jeep.
Nagapabilin nga malubha ang kahimtangan ni “Liberty” nga nagapadayon nga nagapabulong sa hospital samtang ang drayber sang pick up ang yara naman sa kostodiya sang sang Police Station 9.
[sibwp_form id=1]