Zayco-Zayco tandem sa Kabankalan kag Yogore-Miravalles tandem naman sa Valladolid ang gin endorso sang Love-Negros.
Sa pagsinapol sang Love Negros gin endorso nanday Mayor Albee Benitez kag Governor Eugenio Lacson upod kay Vice Governor Jeffrey Ferrer ang liwat nga pagpili nanday anay Mayor Isidro Zayco kag hinablos nga si Vice Mayor Miguel Zayco sa Kabankalan City.
Ginsiling ni Zayco nga luyag niya tagaan atensyon sa iya pagbalik sa pulitika ang pagpasanyog sang programa sa basic services agud mas mapalab-ot sa pumuluyo.
Si Zayco ang natalana nga mangin kasumpong ni incumbent Mayor Benjie Miranda nga katapo sang Partido Federal ng Pilipinas.
Ginpahayag nanday Lacson kag Ferrer nga paagi sa natukod nga coalition sa tunga sang Love Negros kag United Negros Alliance sarang mapaiway ang pagbungguanay sang katapo sang magtimbang nga political group sa probinsya.
Pero sa banwa sang Valladolid ginapaabot ang pagbungguanay nanday anay Mayor Ricardo Presbitero kag Roel Yogore nga utod ni anay mayor Romel Yogore. Mangin ka running mate ni Yogore si incumbent Mayor Enrique Miravalles nga magapapili sa pagkabise alkalde.
Kabahin sa gin endorso sang Love Negros kag Unega sanday anay Silay City Mayor Mark Golez kag Councilor Ryan Gamboa nga magapapili sa mayor kag vice mayor sa madasun tuig.