Ginpapanaog na sang korte ang bag-o nga mga warrants of arrest batuk kay Roy Yanson, Emily Yanson, Celina Yanson Lopez kag Ricardo Yanson Jr., ukon mas kilala bilang Yanson 4 ukon Y4 sa kaso nga qualified theft.
Sa isa ka press conference, ginsiling ni Atty. Norman Golez nga gin-withdraw sang apat ka mag-utod ang masobra sa 803 million pesos nga corporate fund sang Mindanao Star Bus Transport, Incorporated ukon MBSTI.
Ini ang natukiban matapos nga nagdesisyon ang korte nga si Leo Rey Yanson ang lawful board sang MBSTI kag sang ila gin-usisa ang account sang korporasyon sa PNB, natukiban ang pagkadula sang milyon-milyon nga kantidad.
Dugang pa niya, ang cheke nga nakuha sa PNB ang gilayon man nga gin-deposit sa Bacolod City kag Pasig City.
Apang, ginklaro naman ni Celina Yanson sa Digicast Negros, nga wala nila ginhilabtan ang nasambit nga corporate funds bangud gin-freeze ini sang banko.
Dugang pa niya nga yara lang sa account sang korporasyon ang nasambit nga kwarta kag wala sila sang may gin-withdraw.
Pito na ka tuig ang nagligad sang nagsugod ang inaway sa tunga sang pamilya Yanson, kag sa karun padayon man ang pagpasakaay sang kaso sang duha ka kampo.
Dugang ni Golez, 12 ka mga bag-o nga warrant of arrest ang nagahulat sa apat ka mag-utod, apang indi pa ini ma serbe bangud wala sa pungsod Pilipinas ang mga akusado.
[sibwp_form id=1]