Wala na sang disconnection sa kuryente ang Negros Power Electric Corporation sa sumugod sa billing cycle sa bulan sang Mayo tubtob sa Hulyo.
Ini bangud temporaryo nga gin-suspend sang Energy Regulatory Commission ang power disconnection sa bug-os nga Pilipinas.
Ginsiling ni NEPC Energy Sourcing Manager Engr. Christian John Villena, nga ipatuman ini sa tanan nga mga konsumedor sang NEPC mapa-residential man ukon indi.
Ginklaro niya man nga sa bulan sang Mayo nga bill lamang magasugod ang no disconnection. Kon bulan sang Abril pa ang pending nga bill sang isa ka konsumedor, sarang sa gihapon utdan sang kuryente kon indi makabayad.
Ginatugutan man sang NEPC ang flexible payment ukon amat-amat nga pagbayad sang bill ang mga konsumedor nga naga consume sang 200 kilo watts panubo sa sulod sang isa ka bulan.
Samtang, nagapangabay naman ang tagdumalahan sang NEPC sa publiko nga likawan ang pagpalupad sang burador sa mga area nga madamo sang poste sang kuryente bangud delikado ini.
Damlag pa, masobra sa 200 na ka mga burador nga nasangit sa mga poste sang kuryente ang nakuha sang NEPC.
May hitabo nga suno sa NEPC nga may nasangit nga hilo sang burador sa linya sang 69KV Bacolod-Bata Transmission Line nga natug sang power interruption sa pila ka mga sub-stations.*
[sibwp_form id=1]