Indi ang bilog nga Bacolod Public Plaza ang kinahanglan ma-board up ukon kudalan sa pagsugod sang re-development project sang Tourism Infrastructure and Enterprise Zone Authority ukon TIEZA.
Ginsiling ni OIC-City Engineer Loben Ceballos, kutob lamang sa mga 4 ka mga water fountain nga iga-rehabilitate ang kudalan.
Gani indi lubos nga maapektuhan bisan ang mga ambulant vendors sa sulod sang plaza.
Duha ka mga dugang nga below-ground water fountain ang obrahon sang kontraktor sang proyekto para mas mapatahum kag matagaan sang dugang nga duag ang Bacolod Public Plaza.
Nalakip sa kapin P300M nga pondo ang pag-rehabilitate sang water fountain sang Bacolod City Government Center.
Tuyo sang Bacolod LGU nga maghatag sang dugang nga atraksyon ang Bacolod Public Plaza kag BCGC para mapabaskog ang nagalambo nga tourism industry sa siudad.