Supply sang tubig sa relocation site sa Barangay Vista Alegre ang apektado sang tig-ilinit.
Duha sa anum ka mga solar-powered overhead water tank sa Purok Arao 2 sa Barangay Vista Alegre ang halos wala na sang supply sang tubig nga mapalab-ot sa mga residente bangud sang epekto sang mainit nga panahon.
Gani napamensaran ni Public Order and Safety Office head, retired Police General Primitivo Tabujara nga masaylo ang pipeline connection sang mga apektado sang pagnubo sang water supply sa mga malapit nga overhead tank nga may bastante pa nga supply sang tubig.
Nagligad pa nga binulan sang ginpasirad-an sang POSO ang isa sa mga water refilling station nga kabahin sang overhead water tank project agud makakinot sang supply sang tubig kag kuryente.
Ang POSO ang temporary nga nagadumala sang water supply project bangud sang konplikto sa tunga sang mga residente kag nagaserbe nga appointed-officials sang proyekto.
Ginahulat na lamang karon sang Bacolod LGU nga ma-turn-over ang proyekto sang DPWH agud maka-porma sang komitiba nga amo ang magadumala sang water supply project.