Bag-o gid lamang ginbakal sang tag-iya ang Isuzu Elf nga panel truck gikan sa Iloilo, apang Hwebes sang aga, nahulog ini sa pil-as nga may kadalumon nga 50 ka tapak sa Barangay Canturay sa Sipalay City.
Wasak ang ulo kag gupi ang kilid sang panel truck nga may karga nga groceries nga iga-baligya kuntani sa Biyernes sa tiyenda sa Inayawan sa Cauayan.
Nakaangkon sang mga bagras sa lawas ang driver kag ang iya umagad nga pasahero niya.
Suno kay Police Senior Master Sergeant Bobby Biaras, traffic investigator sang Sipalay PNP, naguba ang kambyada kag nadulaan sang preno ang panel truck.
Suno sa driver, nagapadulhog sila sang nagkambyada pero wala na nagsulod. Nagtinguha man siya nga mag-preno apang wala nagkagat. Ginpakamaayo niya nga i-diretso ang salakyan bangud suno sa iya, kun ibunggo niya ini sa mga kahoy, basi matam-an ang iya umagad.
Bangud bag-o pa lang bakal ang panel truck, posible suno sa pulis nga indi pa sini kabisado sang driver.
Nakita naman sang kapulisan nga dako ang nangin bulig sang railings sa pagpahinay sang panel truck kag ang pagsuksok sang driver kag helper sang ila mga seatbelts nga wala sila matam-an.