Dead on arrival sa ospital ang tricycle driver nga si Gary Boy Lursa, 31 anyos matapos nga gintiro sang wala pa makilal-an nga suspetsado pasado las siyete kagab-i sa Purok Kalayugan, Barangay Cabug sa siudad sang Bacolod.
Suno kay Police Station 9 Commander Police Captain Michael Tuburan, gikan sa Brgy. Sum-ag si Lursa nga maga dul-ong kuntani sang mga pasahero sa Brgy. Cabug apang napiyaran sang mga sakay sang tricycle nga may nagasunod nga motor.
Sang maga-overtake ang motor sa may bag-o nga dalan nga parte sang Bacolod-Negros Occidental Economic Highway, nakabati sang lupok ang mga pasahero.
Nga gwa sa dalan ang tricycle. Pensar sang mga pasahero nag lupok lang ang goma sang tricycle pero nakibot na lang sila sang makita ang duguon nga driver.
Igo sang bala sa ulo ang naagom ni Lursa nga gintunaan sang iya kamatayon.
Nagapatigayon sang imbestigasyon ang PNP para matumod ang suspek. Ang biktima ang wala man sa drugs watchlist sang pulis.