Ginpapanaugan na sang siudad sang Bacolod sang notice of violation ang Transcom subong nga adlaw.
Yara na karon sa quarantine facility sang siudad sang Bacolod ang 41 tanan ka mga empleyado sang Transcom nga nagpositibo sa COVID-19.
Ginpahayag ni Bacolod Emergency Operations Center executive director Em Ang nga may kabudlayan sa karon sa ila bahin sa pagpatigayon sang contact tracing sa close contacts sang mga nagpositibo nga empleyado.
Ini bangud may yara sang iban nga wala sa ila nga puluy-an kag may yara naman sang nagbiyahe pa sa gwa sang Bacolod City.
Ginpahayag naman ni Negros Occidental Governor Eugenio Jose Lacson nga walo sa 41 ka mga nagpositibo ang pumuluyo sang Negros Occidental.
Gani may pagkahangawa man ang gobernador sa mahimo paglapta sang virus sa probinsya.
Matapos maserbehan sang notice of violation, pagasirad-an ang establisimiento komersyal sang isa ka adlaw para makapatigayon sang disinfection kag decontamination.
Pero suno kay Ang padayon nila nga i-monitor ang operation sang Transcom kag iban pa nga mga business process outsourcing companies sa Bacolod kun estrikto nga nagasunod sa minimum health protocols.
Ginpatigayon sang Bacolod EOC ang surveillance testing sa 594 ka mga empleyado kag personnel sang Transcom sang Biernes kag Sabado matapos mamutikan ang pagsaka sang mga positibo nga kaso gikan sa amo nga kumbuyahan.
41 tanan ang nagpositibo kag padayon karon ang pagpaidalum sa swab test sa mga close contacts sang mga nagpositibo.