Traktora nahulog sa pangpang sa Barangay Granada sa Bacolod. Drayber napilpilan, patay.
Patay si Mario Tandog, 59-anyos matapos nga mapilpilan sang iya ginamaneho nga traktora nga nahulog sa pangpang sa Hacienda Luygoy 2 sakop sang Barangay Granada sa Bacolod Miyerkules sang aga.
Kaupod sang biktima sanday Rene Sawsi kag Erwin Martinez nga nagapanghakot sang higko sang baka.
Suno sa mga residente sa lugar, makarga kuntani sang higko sang baka nga ginahimo compost ang tatlo padulong sa trailer nga naangot sa traktora.
Nagrekta ang traktora sa pangpang kag nahulog.
Nakahingagaw lumpat gikan sa trailer si Martinez, samtang si Sawsi naman nagtabog.
Samtang si Tandog ang napilpilan sang manibela sang traktora sa dughan nga gintunaan sang iya kamatayon.
Mga tatlo ka oras antes nakuha sang mga rescuers ang lawas ni Tandog.