Ginsugdan na sang Huwebes sang aga ang tatlo ka adlaw nga payout para sa fuel subsidy sang mga Transport Network Vehicle Service kag Delivery Service drivers sa idalum sang Assistance to Individuals in Crisis Situations.
Ang tagsa ka driver sang magabaton sang 5,000 pesos.
Ginsiling ni Department of Social Welfare and Development Negros Island Region Director Arwin Razo nga 3,900 ka mga drivers sa bug-os nga rehiyon ang nalakip sa listahan kag kalabanan diri ang taga Bacolod City.
May tatlo ka payout centers ang DSWD kon sa diin ang Districts 1 kag 2 yara sa Cadiz City, Districts 5 kag 6 sa Kabankalan City samtang ang nabilin nga mga distrito yara sa Bacolod City.
Samtang, nagpasalig man ang DSWD nga ila ginalagas nga sa Sabado nga adlaw ma-release naman ang ngalan sang mga drivers nga wala malakip sa una nga listahan.
Ini matapos nga madamo sang drivers, ilabi na mga Grab drivers ang nagareklamo nga wala sila madala sa ayuda.
Pagklaro ni Razo, sa Region 6 na-tag ang Grab, rason nga wala makasulod sa system sang DSWD-NIR ang mga ngalan sang mga drivers sini.
Kapin sa 2,800 ka mga drivers kag riders sa idalum sang Grab ang natalana nga idugang sa listahan sang mga drivers nga makakuha sang ayuda sini nga semana.
Sa una nga adlaw sang payout sa Bacolod City, 1,000 ka mga drivers kag riders ang tigayon nga nakabaton sang ayuda.
"Sa Negros Island Region, we have a target of 3,900 pero merong additional na Grab, na winiwork-out namon yung clean list that's another more than 2,000 (mga 2,800). So ang 3,900 started today and hopefully maihahabol namin yung Grab by Saturday. Yung requirement niya para the riders or drivers na eligible makuha na nila. So that's within the duration of Thursday, Friday, Saturday”, suno kay Razo.*
[sibwp_form id=1]