Sugdan na sang siudad sang Bacolod ang random testing sa mga baboy matapos nga nag-abot subong nga adlaw ang mga test kits nga ila ginbakal.
Ginsiling ni Bacolod City Administrator Atty Mark Steven Mayo, lima ka box sang test kits ang ginbakal sang siudad kag ang tagsa ka box may unod sang 96 ka mga testing kits. 425,000 pesos ang pondo nga ginpain sang siudad sa pagbakal sini.
Matapos ang pag-anunsyo sang City Veterinary Office nga may nagpositibo na sa African Swine Fever nga baboy sa Bacolod kahapon nga adlaw, nagsugod naman ang surveillance sa mga barangay nga madamo sang nagasagod sang baboy.
Ini agud matumod kun ano nga mga baboy ang pwedi makuhaan sang samples para sa random testing.
Suno kay Mayo, kun makita sang CVO nga kulang ang test kits base sa sitwasyon, dugangan ini sang siudad.
May apat na ka baboy ang nagpositibo sa ASF. Duwa diri ang gikan sa Barangay Alijis kag duwa man sa Barangay Taculing.
Sandig sa pagsulundan, iga-cordone sang CVO ang 500 meter radius sang nahamtangan sang baboy nga nag positibo sa ASF samtang ang mga baboy naman nga maapektohan sang 500 meter radius, ang posible nga i-depopulate.
Sa karun, gina finalize na sang siudad ang pag deploy sang mga personnel sa 13 ka mga entry points sang siudad agud mapatuman na sang hugot ang pork ban.
430 ka mga backyard hog raisers ang yara sa Bacolod City samtang may masobra sa 5,000 naman ang kabug-osan nga populasyon sang baboy sa siudad.
[sibwp_form id=1]