
Isa ka pedestrian ang ginbawian sang kabuhi samtang duha naman ka mga menor de edad ang pilason matapos magdiretso sa ila ang canter truck antes ini nahulog sa kilid sang dalan kag natumba sa isa ka balay sa Hacienda Aimee, Barangay Tinampa-an, syudad sang Cadiz, Negros Occidental, Martes sang ugto.
Nadala pa sang mga rescuers sa ospital ang tatlo ka nga pedestrians apang nagtaliwan ang 59-anyos nga babaye.
Ginsiling ni Police Lt. Col. John Joel Batusbatusan, hepe sang Cadiz Police Station, mechanical error ang ginalantaw kabangdanan sang insidente matapos gulpi lang nga indi na ma-control sang driver sang Canter Truck ang manibela, rason nga nagliko ini sa pihak nga lane kag nadalasa ang mga pedestrian nga yara sa lugar.
Nahulog ang Canter Truck sa kilid sang dalan kag natumba sa isa ka balay.
Gikan sa Hacienda Avocado kag padulong kuntani sa hardware ang Canter Truck.