Nagapangayo sang hustisya ang himata sang call center agent nga naglabog sa motorsiklo kag nalapakan sang itom nga pick up truck malapit sa flyover, nga yara sa dalan Araneta, Barangay Singcang-Airport sa siyudad sang Bacolod, mga las 2 Martes sang kaagahon.
Patay ang 27 anyos nga biktima matapos maka-agum sang mga samad sa ulo, samtang ang iya 28-anyos nga live-in partner, nga amo ang naga-drive sang motorsiklo, ang naka-angkon naman sang minor injuries.
Ginsiling ni Police Executive Master Sergeant Rodney Tiania, assistant head sang Bacolod Traffic Management Unit, naglabay sa flyover padulong norte sang dalan Araneta ang Yamaha Aerox nga motorsiklo sang mag-partner, apang sang manug-lampuwas na sila, may nasugata sila nga baha bangud naga-ulan sadto nga tion, rason nga sila ang natumba.
Gin-ako man sang driver sang motorsiklo sa traffic investigator nga may kadasigon ang iya pag padalagan, gani wala niya mabalanse ang motorsiklo sang ini ang naglabay sa tubig baha.
Naglabog ang call center agent sa pihak nga lane sang mga salakyan nga nagapadulong sur, kag siya ang nalapakan sang naglabay nga pick up truck.
Suno sa mga nakakita, nagdulog kadali ang pick up apang makaligad ang pila ka segundos, ini ang naglakat, suno kay Tiania.
Nag-deploy na sang dugang nga investigator ang TMU agud magkadto sa mga establisyemento sa lugar para makakuha sang kopya sang CCTV footages.
Maga-duty kuntani ang call center agent sang nagluntad ang insidente.
May panugyan naman ang TMU sa publiko agud mabuligan sila nga makilal-an ang driver sang pickup truck:
“Basi may ari diri ma’am nga tagpalamati ukon mga televiewers niyo nga may idea sa amo nga aksidente kag during that time positive man sa area ukon nagabiyahe nga basi bala may mga dashcam sila sa ila nga mga salakyan so basi pwede nila ma-review dira kung during that time.. mga las 2 sang kaagahon gid natabo.. basi pa man lang maangot ta sa amo nga aksidente.. Makig-angut lang sila sa amon diri opisina ukon sa pinakamalapit nga police station”, suno kay Tiania.