May isa na ka person of interest nga ginatutukan karon sang katapo sang Police Station 5 nga mahimo may kahilabtanan sa kamatayon ni Christian Bawang nga nasapwan patay sa Barangay Alangilan sa Bacolod sang Lunes.
Ginsiling ni Station commander Police Major Marc Joeil Reclamado, gina-usisa man nila ang mga naka-upod sang biktima antes ini ginpatay.
May isa ka sachet sang shabu nga na-recover sa bulsa sang biktima nga may pilas sa ulo tuga sang igo sang pusil kag gingapos sang duct tape.
Sa panid sang karton nga natabon sa iya bangkay nakasulat ang ngalan sang iya amay nga na-priso tungod sang kaso may kaangtanan sa iligal nga droga.
Pero indi pa mapat-ud sang kapulisan kun bala may kaangtanan sa iligal nga droga ang motibo sa pagpatay sa iya amay.
Ginpaidalom na sa fingerprint examination ang mga narecover nga pagkabutang sa bangkay sang biktima.
Si Bawang nga taga-Purok Villamar sakop sang Barangay Estefania ang nagaserbe nga youth leader sang LGBTQ community.