Kahapon ginsugdan na ang special flight sang Philippine Airlines para sa mga fully vaccinated.
Nangin masulhay ini suno kay provincial administrator Rayfrando Diaz, kag puno ang amo nga flight.
Luyag sang probinsya nga local lang anay kag indi pag itanyag sa web ang amo nga biyahe, agudto una nga maka avail ang mga fully vaccinated nga Negrense kag una nga maka batun sang amo nga benepisyo – ang discounted nga plete kag pag paiway sang negative RT PCR test result sa biyahe padulong sa probinsya.
Dugang pa ni Diaz, igo man lamang ini nga ma plastar na sang maayo ang QR code system sang probinsya para sa mga vaccine ID. Tubtob sa Nobyembre 29 ang amo nga special flights nga naka schedule mag biyahe, kada Lunes kag Biyernes.
Samtang, nag hinyo naman sang permiso ang Vallacar Transit nga maka biyahe na sa Negros Occidental gikan Oriental.
Pero suno kay Diaz ginahulat pa nga ma aprobahan anay sang Negros Oriental ang pagtabuk gikan sa Occidental gamit ang sistema kun sa diin batunon man ang fully vaccinated individuals kag negative RT PCR test naman ang ipakita sang mga wala nabakunahan.